Nyiɔɔ ‑si' 'kaa Kea ‑mɛ nɩ'
90
Kea 'a dbonʋɩ Moisɩ 'a baewlu.
'Oo Tʋ "bo, dɛ ‑tba' 'de na" e ba' o i ɛ,
‑mɔ ‑nɩ ‑aa sro' 'wlaa na'.
2 ‑Ta crʋ sea nʋʋɛ,
‑wɛe ‑ɩn sea 'blʋa ke 'kmʋ nʋ ɛ,
‑mɔ, Kea ‑ɩn nɩ' sese.
3 ‑Mɔɔ wlu nyiɔ ‑pee ‑ɩn ‑na:
Ao mu 'e 'blʋ 'ʋn de, 'Sʋ nyiɔɔ 'mɛɛ.
4 Dɛ ‑nʋɛ, ‑sɩn 'a "wlu due' ‑kɔ' 'wɩ due' ‑ɛɛ ‑sia',
ka "jriɛ ‑tɛ due' nɩa "maʋ ɛ.
5 ‑Ma ‑sii nyiɔɔ' 'wɩ 'mɛ ka
"nyɩɔ' ɔ jiia nyʋ "jri "kpei
'de ‑sɔn' 'ɔ peeɛ 'ʋn ɛ. Ka 'sii" nɩa 'ka ʋʋ nɩ.
6 Ɛɛ ‑fan' ‑klae" pɛɛn,
‑bo ‑kwie" ka 'sʋ ɛ "joo ‑wɛe ɛ jɛ 'sʋɛ'.
7 ‑Ma 'cɛn ɛ nɛ ɛ siian ‑ʋn ‑ɛ,
‑ma 'cɛn klaa" waa ‑ʋn dɛ 'dii.
8 ‑Aa dɩsaɩn ‑wee'‑ nɩɛ 'de ‑ʋn "jri "kpei,
‑wɛe ɩ 'pɛɛn‑ "kpae' 'de ‑ma ‑sɔn 'ʋn.
9 Ɛ 'kpaa ‑a 'cɛn i ɛmɛ ‑tɩ ‑aa 'wɩ ‑wee'‑ a ‑si',
‑aa ‑sɩn a 'pʋʋan' ka fɩɩɛ' ɛ ‑cria' 'de mu ɛ.
10 ‑Aa 'wɩ a nyniɛ ‑sɩn 'a kwla ‑mɛ" 'sɔn 'de 'kmʋ "kpei.
Nyʋ ‑ʋʋa nmi kua 'ʋn
mʋ ‑ʋʋa nʋ ‑sɩn 'a kwla ‑mɛ" na.
'Kaa ɩ nɩɛ "nmia ke 'kle 'je ‑sɩn ‑o,
ɩ ke ‑aa ‑si' fɩafɩa‑ ka nawɛɛ ɛ "wan a.
11 Nyɔ ‑jɔ ‑juua ka ɛɛ' 'cɛn kmai"
‑wɛe ‑ɔɔ ‑tua" ɔɔ' ‑cɛ" 'ɛ ‑tɩ' 'de ɛɛ' faʋn nɩ 'e 'ʋn ‑ɛ?
12 Tʋ "bo, ka ‑aa 'wɩ "kɔan' "mlai ɛ tɔɔ ‑aʋn
'de ‑a ‑je tɔ' 'di 'kpa ‑a ‑je ‑aa 'wɩ ‑sro' ka juuo‑.
13 Ɛ ja tɔ' de Tʋ "bo,
‑Ta ka ‑a ‑ke ɛɛ' 'cɛn mɛ 'je nyni ‑ɛ?
Ɛ 'je ɛɛ' "juɛi nʋʋnyʋ 'a wɛe.
14 Ɛ "jii ‑aʋn ɛɛ' nyʋ 'a ‑tɩ' kmaa' 'ʋn ‑klae" pɛɛn jeejee.
‑Bo ɛ nɩ kan' ‑mɛ ‑aa muɛ blaa'
‑a ‑je dee‑ 'de 'wɩ ‑wee'‑ 'di.
15 Ka ‑aa 'kle 'je wɩ ‑tia,
‑ɩn nʋɛ ‑aa 'mʋa‑ ‑sɩn 'je kan' ‑ti.
16 Ɛɛ' nʋʋdɩ 'je 'kwla 'wlʋ 'de ‑a ‑pee
'de ‑aa "nynuu 'je kɛ nɩa Kea klaa" juuo‑.
17 Nyʋ 'blei‑ ‑aa Kea, ɛ nʋ ‑aʋn ɛɛ' jrɛɛju 'ʋn,
ɛ nʋɛ dɛ ‑aa sʋn blai" 'je "si.
Kɩɩn, ɛ nʋɛ 'de dɛ ‑aa sʋn blai" 'je "si.